రాయదుర్గం:
వాల్మీకి మహర్షి జీవితాన్ని నేటి తరం ఆదర్శంగా తీసుకోవాలని ప్రభుత్వ విప్ కాపు రామచంద్రారెడ్డి, ఎంపీపీ తలారి రంగయ్య, జెడ్పీ చైర్‌పర్సన్‌ గిరిజమ్మ, డీసీసీబీ చైర్‌పర్సన్‌ నికిత కోరారు. రాయదుర్గం మండలం టి.వీరాపురంలో బొడ్డురాయి, గ్రామదేవత (పోలేరమ్మ), అడుషి సుంకులమ్మ, వాల్మీకి విగ్రహాలను బుధవారం వైభవంగా ప్రతిష్ఠించారు.
కార్యక్రమానికి ముఖ్యఅతిథిగా వాల్మీకి కార్పొరేషన్‌ చైర్మన్‌ పోగాకుల రామచంద్ర, వైఎస్‌ఆర్‌సీపీ రాష్ట్ర కార్యదర్శి తిప్పేస్వామి, పమిడి వీరాంజినేయులు, జెడ్పీటీసీ సభ్యుడు హొన్నె మల్లికార్జున హాజరయ్యారు.
ఈ సందర్భంగా వారు మాట్లాడుతూ వాల్మీకి మహర్షి రామాయణంతో ప్రపంచాన్ని సుసంపన్నం చేసిన దార్శనికుడని కొనియాడారు. వాల్మీకులను ఎస్టీ జాబితాలో చేర్చాలని అసెంబ్లీలో ప్రభుత్వం ఏకగ్రీవ తీర్మానం చేసి కేంద్రానికి పంపడాన్ని ఎత్తిచూపుతూ వాల్మీకుల సంక్షేమానికి సీఎం జగన్ చిత్తశుద్ధితో కృషి చేశారని కొనియాడారు.
అక్కడి నుంచే సరైన నిర్ణయం తీసుకోవాలని వారు ఉద్ఘాటించారు. గత ప్రభుత్వ హయాంలో వాల్మీకులను ఎస్టీ జాబితాలో చేర్చకుండా చంద్రబాబు ద్రోహం చేశారని ఆరోపించారు. టీడీపీ నేతల స్వార్థం కోసం వాల్మీకుల ఆత్మగౌరవానికి భంగం వాటిల్లిందని మాజీ మంత్రి కాలవ శ్రీనివాసులు విమర్శించారు.ప్రస్తుత ప్రభుత్వానికి అండగా నిలవాలని పిలుపునిచ్చారు.
అంబేద్కర్‌ విగ్రహానికి పూలమాలలు వేసి నివాళులర్పించగా, తాలూకా వాల్మీకి సంఘం అధ్యక్షుడు బండి కిష్టప్ప, ఎన్‌టీ సిద్దప్ప, గ్రామ సర్పంచ్‌ ఓబులమ్మ, ఎంపీటీసీ బోయ రాజమ్మ, జంగమ కార్పొరేషన్‌ డైరెక్టర్‌ పుష్పవతి, సింగిల్‌ విండో అధ్యక్షుడు లక్ష్మీరెడ్డి, వడ్రవన్నూరు భీమప్ప, గ్రామ ప్రముఖులు, నాయకులు తదితరులు పాల్గొన్నారు.
అదేసమయంలో విగ్రహ ప్రతిష్ఠాపన సందర్భంగా గ్రామంలో అక్కాచెల్లెళ్లకు వడిబియ్యం కార్యక్రమం నిర్వహించడంతోపాటు పలు దుకాణాలు, పౌరాణిక, బైలు నాటకాలతో ఆకట్టుకున్న బహిరంగ జాతర నిర్వహించారు.
Discussion about this post